主頁 » 教育 » 我女朋友個仔, 3 歲好百厭!
適合: 1 - 3歲
我女朋友個仔, 3 歲好百厭!
觀看原文 | 我要留言 | 查看(1076)
會員:Asian_Kung_Fu

我女朋友結過婚, 佢有一個啱啱 3 歲嘅仔。

哩個小朋友令我好痛苦,
佢好百厭, 同佢一齊出街好辛苦,

1.) 四圍走 + 唔比拖
- Outdoor 都尚算肯比我拖住手, 但一入到 Indoor Area, 地鐵等, 佢就以為自己去咗 Playground, 四圍走, 唔肯比人拖, 唔肯企定定 (如排隊)

2.) 脾氣極臭 + 硬頸
- 每當佢要嘅野, 想嘅野得唔到時, 佢就會 尖叫 / 哭叫 / 打人 .

舉例 :
- 在商場有時突然人頭湧湧, 我想將佢拖返住, 同佢講, 好多人呀, 好危險呀, 但我一拖佢, 佢就會踎底, 死要縮手, 跟住大叫, 如果我抱起佢, 佢會勁打我, 兩隻腳勁踢, 我放返底佢佢會哭叫, 尖叫 ... 叫完一大輪先自己停, 然後自己乖乖行, 但都唔肯比你拖 ! 或者衝返去比阿媽抱 ...


- 佢知我袋入面有支水 or 有部 NDS, 佢會自己摷我個袋, 我當然會 STOP 佢啦, 咁無禮拜嘅行為, 佢會開始哭叫, 我叫佢講 "唔該, 我想玩 NDS", 佢唔肯, 繼續伸埋黎要開我拉鏈, 不然佢就尖叫, 打你, 令全地鐵嘅人都向你投黎不友善目光 ...

3.) 揀飲擇食 + 語言能力落後
佢雖然 3 歲, 但樣同體型似 2-2.5 歲, 明顯落後卻同時揀飲擇食, 極擔心, 我自己都得 160 咁上下, 深知唔夠高好唔著數, 我唔想佢步我後塵.
佢雖然 3 歲, 但只識得講簡單詞彙 (只可講兩到三字詞語, 簡單句子亦欠奉), 我自己口才唔錯, 深知言語劣拙對日後上學, 人際, 工作同溝女都有不良影響.
令人欣慰嘅係佢聽係 OK 既, 大部份時間佢都明人哋同佢講嘅野.

我唔想佢變成賜座男/港孩, 但, 我可以點教好佢呢 ?

kowkfung意見:

聽落又好似爭啲, 幾辛苦,可能小朋友缺乏父愛, 會咁卦。但教小朋友要比好多時間同愛心的, 你可以做的只可以努力啲囉

思明意見:

睇你咁講我覺得佢仲係trouble two個階段,因為你地可能處理得唔好,所以到3歲都keep住呢d問題,又或者佢未接受到你,所以特別唔聽你講(我見你講有咩事佢都會揾返媽咪)平時係邊個湊佢多,你講果d情況又係咩情形下發生,就算我個仔都 好,佢同我出街/同爸爸出街己經可以係兩回事,但我都會建議你留意下你同佢講野時ge語氣,同埋首先諗下會唔會係自己做左d咩令到佢有呢d情況出現,教小朋友反思係好重要

1.) 四圍走 + 唔比拖
你可以試下同佢約法三章,如果係你地視線範圍同埋人少少又安全情況下,我覺得俾佢周圍走下都無咩問題,但大前提係一定要大家都望到大家,你叫佢佢會聽到,佢講野你又會聽到,如果唔係就一定要拖住,如果佢唔肯拖發曬脾氣你都唔好屈服,等佢喊夠扭夠再同佢講道理再重申你ge要求。至於排隊,你有冇同佢解釋過咩係排隊,排隊要做d咩呢

2.) 脾氣極臭 + 硬頸
呢樣完全係trouble two ge表現黎,同埋想問一問佢發脾氣你地平時會點處理??

3.) 揀飲擇食 + 語言能力落後
揀飲擇食去到咩地步先??唔食菜?唔食肉?身高除左後天因素亦會受遺傳影響,如果佢爸媽都唔係太高,呢個小朋友都唔會係太高(當然會有例外啦),如果佢揀飲擇食我會比較在意佢係咪有均衡營養,而唔係身高~

Asian_Kung_Fu補充:

多謝思明提到 "Trouble Two" 哩個Keyword, 我會去找更多 Reference ...

可能我講多 d d background 會好 d.

小朋友應該唔會缺乏父愛... 其實哩個小朋友平時係同爸爸同嫲嫲住既, 係放假我女朋友先會湊佢返去, 咁出去玩我哋都會一齊去, 所以我哋會有接觸。

但好好彩哩個小朋友同我都好friend既, 玩嘅時候. 我餵野食佢都肯食, 都算係咁, 如果唔係第二個, 佢都未必彩人.

實情係, 佢平時唔係跟我哋住, 比佢阿爸嗰邊 d 人縱慣曬, 佢有一個家姐 (同父異母), 應該咩都會就曬佢, 估計出街兩姊弟可以百厭到你眼都突埋...

BTW, "但我都會建議你留意下你同佢講野時嘅語氣" <--- 我無乜特別留意, 我諗我自己會 soft d 囉, 有咩影響架 ?

思明意見:

咁佢家庭背景都好複雜,同埋我諗佢地未必好有心機去教好小朋友(個人認為),當然實情係點你地可以從小朋友同你哋相處時嘅行為去睇到平時照顧佢嘅人/同佢相處嘅人行為模式,因為呢個階段小朋友所做出黎嘅行為大部份都係模仿緊佢嘅照顧者/日常接觸到嘅人,所以你哋嘅言行對佢會有一定影響

其實你話佢易發脾氣,我可以講個發生係我自己身上嘅例子俾你聽

當時我個仔兩歲三個月,正值Trouble Two時期,呢個時候我由在職媽媽轉左做全職媽媽,留喺屋企全力照顧佢,但之前我因為返工好忙,個仔唔多跟我,而我亦唔多熟悉佢嘅脾性(講起都覺得慚愧),當我接手就發現佢脾氣好臭,好硬頸,乜都話要自己做,到佢做唔到就發脾氣,當佢發脾氣扭計我就會鬧佢/發佢脾氣,加埋教佢去廁所等等嘅事,我哋每一日就係發脾氣同吵吵鬧鬧咁過....我每日心情都好差,而且覺得自己好無用

之後我覺得咁落去唔係辦法,同個仔嘅關係仲差過之前返工嗰時...偶然嘅機會我去上一d關於教小朋友ge課程,上左2-3堂就明白佢某一d行為係成長必經,亦知道原來係我嘅情緒影響咗佢,並唔係佢影響我(因為我對佢惡/發佢脾氣,所以我以為咁樣係解決問題嘅最好方法)之後我儘量都會控制自己情緒,減少鬧,變為一d讚賞同鼓勵,好快就見到成效,個仔發少左脾氣,有野做唔到唔會再發忟憎,會黎揾我叫我幫佢手,所以每一次我係呢度見到有成人係度話自己小朋友有行為問題,我都會建議佢地先留意自己言行,再去諗清楚問題係源於邊一度

答返你個問題先,同小朋友講野嘅用詞同語氣都好重要,我先生同個仔講野語氣比較重(比較似命令),而我小朋友對住佢講野時都會用返一d比較差嘅語氣同佢講野,而我會比較溫柔d,佢同我講野嗰陣都會溫柔d,所以要先留意一下自己,再去諗點做

比較長左d,但希望對你有幫助 (可能有d一舊舊,唔知你明唔明)